تاریکی میں بھی اُس کو پُکارا نہیں جلتا
جنگل تو جل اٹھتا ہے پر آرا نہیں جلتا
زندہ نہیں بچتا تُو جسے چھوڑ کے جائے
تُو جس کو بجھا دے وہ دوبارہ نہیں جلتا
وہ ہونٹ نہیں کھولتا جس وقت میں بولوں
جب سبز جلے سرخ اشارہ نہیں جلتا
وہ دوسرے لوگوں کے بجھاتا ہے ستارے
جس آدمی کا اپنا ستارہ نہیں جلتا
دو سال میں اک داغ نہیں اُس کے بدن پر
جلتا ہوں مگر سارے کا سارا نہیں جلتا
آنکھیں نہیں کھلتی ہیں کسی کی مرے آگے
اُن کی بھی جو کہتے تھے بچارہ نہیں جلتا
ہوتی ہے ملاقات کئی مرتبہ دن میں
ٹکراتے تو رہتے ہیں شرارہ نہیں جلتا
اب اُس کو جلن ہو رہی ہے میری چمک سے
جو بولتا تھا کچھ بھی ، تمھارا نہیں جلتا
شمشان میں رونق تھی مری موت سے پہلے
وہ یوں کہ وہاں ہجر کا مارا نہیں جلتا
میری بھی پرستش کرو سورج کی طرح تم
میرا بھی کوئی ایک کنارہ نہیں جلتا
متوازی جہانوں میں طبیعات الٹ ہے
رفتار پکڑتا ہوں تو گارا نہیں جلتا
سیلاب نہیں آئے گا دربار میں مژدم
جب تک کہ کوئی راج دلارا نہیں جلتا
