لمس کی آنچ پہ جذبوں کی اُبالی چائے
عشق پیتا ہے کڑک چاہتوں والی چائے
کیتلی ہجر کی تھی غم کی بنا لی چائے
وسل کی پی نہ سکے ایک پیالی چائے
میرے دالان کا منظر کبھی دیکھو آ کر
درد میں ڈوبی ہوئی شام، سوالی چائے
ہم نے مشروب سبھی مضرِ صحت ترک کئے
ایک چھوڑی نہ گئی ہم سے یہ سالی چائے
یہ پہیلی کوئی بُوجھے تو، کہ اُس نے کیونکر
اپنے کپ سے میرے کپ میں بھلا ڈالی چائے
میں یہی سوچ رہا تھا کہ اجازت چاہوں
اُس نے پھر اپنے ملازم سے منگالی چائے
اِس سے ملتا ہے محبت کے ملنگوں کو سکون
دل کے دربار پہ چلتی ہے دھمالی چائے
عشق بھی رنگ بدل لیتا ہے کبھی جانِ وفا
ٹھنڈی ہو جائے تو پڑ جاتی ہے کالی چائے
